"अस्पष्ट आकृती "

घुमणा-रा वा-राचा आवाज,

व्हाळाचा आवाज,

फडफडणा-रा पक्ष्याचा आवाज,

छत्री घेउन अंधारात

चालणा-रा व्यक्तीच्या

पावलांचा आवाज,

चुल फुंकताना

नळीतुन आलेला आवाज,

हे आवाज ऐकणा-रा

एका व्यक्तीच्या हसण्याचा आवाज....

त्या व्यक्तीची एक

अस्पष्ट आकृती

रात्री झोपेत दिसते.

"पाखरांशी नात"

दुरुन पाहिलं तर क-हाड जळतं होतं
रानाला आगीशी झुंजताना मी पाहिलं होत....

जिव वाचवत होती सारी पाखरे
तेंव्हा पाखरांच रानाशी नातं तुटतं होतं....

जळून राख झाली काही पाखरे
ते पाहुन मनं माझं रडलं होतं....

मी उभा पाहत राहिलो जळताना सारं
माझं पाखरांशी नात मला कळालं होतं....

"चिंच"

लहाणपणी शाळेत जाताना

वाटेतल्या चिंचेच्या झाडची चिंच

चोरुन चोरुन खायचो....

नेहमीचाचं असा खेळ होता आमचा

खुप मज्जा यायची चोरुन चोरुन

चिंच खायला.

एक दगड मारला की,

दोन चार चिंचा हमखास पडायच्या...

जमिनीवर पडलेल्या चिंचा उचलताना

व्हायची मं भांडण आमच्यात

"हि माझी चिंच आहे आणि हि तुझी चिंच आहे."

त्या भांडणाचा आनंद अजुनही मनात आहे,

त्या चोरलेल्या चिंचेची आंबट गोड चव

अजुनही जिभेवर आहे तशीच...

जातो कधी कधी त्या वाटेवर

मनात आलं कि...

मनात तर असतं माझ्या

एक दगड मारुन मस्त पैकी

दोन चार चिंचा पाडायच्या....पणं,

भांडायला ते मित्र नसतात आता.

"चिमुरडी"

का केलं? कोणी केलं? कश्यासाठी केलं?

तिचे ओठ विणलेले, डोळे उघडेच्या उघडे

न हातापायांची हालचाल,

ना कसलीच हालचाल....

एका निर्जीव वस्तु प्रमाणे स्वतःला

आरश्यात पहात असते....

सारं काही सुन्न झालेलं दिसत होतं.

तिच्या मनातली किंकाळी मात्र साफ ऐकायला येत होती...

का केलं?कोणी केलं?कश्यासाठी केलं?

ह्या प्रश्नांची उत्तर ति नं ऐकू येणा-रा

किंकाळीत शोधत बसलीयं....

प्रश्नांच्या वादळात अडकलेली एक चिमुरडी

आरश्यासमोर स्वतःला सारखी सारखी

लुटताना पहात असते.

कधी मी जागा होईन?

संध्याकाळी समुद्राच्या ओहोटीला

पाहून एक विचार मनात येतो...

कधी त्या ओहोटीच्या लाटा

बेफामपणे माझ्या दिशेने येतील आणि

मला भिजवून टाकतीलं?

आणि कधी मी जागा होईन?

मी स्वतःला जाग करण्याची

वाट पहात असतो...

त्या समुद्राकडे पहात पहात...

"तडीपार"

ह्या गारव्यात एका छानश्या

जागी शेकोटी पेटवून...

रात्रीला गच्च मिठी माराविशी वाटते.

आणि त्या मिठीत पुरी रात्र

जागयची...काढायची...

ज्या वेळी मी असा विचार करतो

त्यावेळी हि रात्र मला

तडीपार करते...

"तुला इतकं सांगुन"

तुला इतकं सांगुन सुध्दा
तु नाही ऐकत...
तुझ्यावरं कविता लिहायला
मला तु नेहमीचं
गळ घालतेस...


तुला इतकं सांगुन सुध्दा
तु नाही ऐकत...
तुझ्यावर लिहीलेल्या कवितांना
तुझ्यासोबत लपवून
घेउन जातेस.....